بىرلەشكەن دۆلەتلەر تەشكىلاتى باش كاتىپىنىڭ باياناتچىسى سىتېفان دۇجاررىك، نىيۇ يوركتىكى ب د ت باش شىتابىدا ئۆتكۈزۈلگەن كۈندىلىك مۇخبىرلارنى كۈتۈۋېلىش يىغىنىدا، ئوتتۇرا شەرقتىكى نۆۋەتتىكى ئۆزگىرىشلەر ھەققىدە مەلۇمات بەردى.
غەززەدىكى ئىنسانىي تىراگېدىيە ھەققىدە توختالغان دۇجاررىك: «ئائىلىلەرنىڭ تەخمىنەن بەشتىن بىرىنىڭ كۈنىگە پەقەت بىر ۋاخ تاماق يېيەلەيدىغانلىقى بىلدۈرۈلدى. ئائىلىلەر تۇرمۇشتا ئېغىر قىيىنچىلىق تارتىۋاتىدۇ، بۇ ئائىلىلەرنىڭ % 50 ىنىڭ ئالدىنقى ئايدا كەم دېگەندە بىر قېتىم يېمەك-ئىچمىكىنىڭ پۈتۈنلەي تۈگىگەنلىكى مەلۇم قىلىندى» دېدى.
ئاشلىق باھاسى ئىنتايىن قىممەت
دۇجاررىك دۇنيا ئاشلىق تەشكىلاتى (WFP) نىڭ رايونغا مۇناسىۋەتلىك دوكلاتىغا تايىنىپ، غەززەدە مۇشۇ ئايدا ھازىرغىچە ئائىلىلەرنىڭ تۆتتىن ئۈچ قىسمىنىڭ نەق پۇل يېتىشمەسلىك ۋە ئاساسلىق ئاشلىق تۈرلىرىنىڭ قىممەت بولۇشى سەۋەبىدىن «بازارلارغا بېرىشتا قىينىلىۋاتقانلىقى» ئۇچۇرىنى ھەمبەھىرلىدى.
باياناتچى دۇجاررىك: «غەززەدە نۇرغۇن ئاشلىق مەھسۇلاتلىرى، 2023-يىلى توقۇنۇشلار ئەۋج ئېلىپ كېتىشتىن بۇرۇنقى مەزگىلگە سېلىشتۇرغاندا كۆرۈنەرلىك دەرىجىدە قىممەت» دېدى. ئۇ يەنە رايوندا پائالىيەت ئېلىپ بېرىۋاتقان ئىنسانپەرۋەرلىك ياردەم خادىملىرىنىڭ بولسا داۋاملىشىۋاتقان خەۋپسىزلىك مەسىلىلىرى ۋە چەكلىمىلەرگە قارىماي، ئۆز ۋەزىپىلىرىنى ئۆتەشكە تىرىشىۋاتقانلىقىنى سۆزلىرىگە ئىلاۋە قىلدى.
