فىرانسىيە ئىچكى ئىشلار مىنىستىرى لورېنت نۇنېز يېقىندىن بۇيانقى دۆلەتنى لەرزىگە سالغان نامايىش ھەرىكەتلىرىگە ئالاقىدار ئېلان قىلغان باياناتىدا، 158 مائارىپ ئاپپاراتى ئەتراپىدا «شەھەر زوراۋانلىقى» ۋەقەلىرىنىڭ رويخەتكە ئېلىنغانلىقىنى ئېيتتى.
فىرانسىيە مىقياسىدا داۋاملىشىۋاتقان ئوقۇغۇچىلار نامايىشلىرىدا دۈشەنبە كۈنىدىن بۇيان 5 مىڭدىن ئارتۇق كىشى نازارەتكە ئېلىندى.
ئىچكى ئىشلار مىنىستىرى لورېنت نۇنېز، TF1 قانىلىنىڭ زىيارىتىنى قوبۇل قىلىپ، مەملىكەت مىقياسىدىكى نامايىشلار جەريانىدا 158 مائارىپ ئاپپاراتى ئەتراپىدا «شەھەر زوراۋانلىقى» ۋەقەلىرىنىڭ يۈز بەرگەنلىكىنى ئېيتتى.
نۇنېز 735 مەكتەپنىڭ ئېغىر تەسىرگە ئۇچرىغانلىقىنى ۋە 1747 كىشىنىڭ نازارەتكە ئېلىنغانلىقىنى بىلدۈدى ۋە نامايىش كۆلىمىنىڭ «ھەيران قالارلىق» ئىكەنلىكىنى ئىپادىلىدى.
تېخىمۇ ياخشى مائارىپ شارائىتى تەلىپى بىلەن ھەپتىلەردىن بۇيان داۋاملىشىۋاتقان نامايىشلار دائىرىسىدە، جۈمە كۈنى يۈزلەرچە مەكتەپ تاقىلىپ قالدى ياكى ئوقۇتۇش ئاقسىدى. مەملىكەت مىقياسىدا ئاممىۋى نازارەتكە ئېلىشلار يۈز بەرگەن بىر پەيتتە نۇرغۇن كىشى يارىلاندى.
نۇنېز نامايىشلار جەريانىدا تۈرلۈك جىسىملارنىڭ ئېتىلغانلىقىنى، ساقچىلارنىڭ، ئوقۇتقۇچىلارنىڭ، ژۇرنالىستلارنىڭ ۋە ئەتراپتىكى كىشىلەرنىڭ ھۇجۇمغا ئۇچرىغانلىقىنى ئېيتتى.
دائىرىلەرنىڭ بىلدۈرۈشىچە، پەيشەنبە كۈنى مەكتەپلەرنىڭ ئالدىدا تەخمىنەن 900 نامايىش ئۆتكۈزۈلگەن، تەخمىنەن 2 مىڭ كىشى نازارەتكە ئېلىنغان. ۋەقەلەردە 300 دىن ئارتۇق ساقچى ۋە ژاندارما خادىمى يارىلانغان.
ئوقۇغۇچىلار ھەرىكىتىگە ۋەكىللىك قىلىدىغان تۈرلۈك تەشكىلاتلار بىلەن سولچىل ۋە ئەسەبىي سولچىل سىياسىي گۇرۇپپىلار، ساقچىلارنىڭ «بېسىمى» دەپ تەرىپلىگەن پوزىتسىيەلەرگە قارشى 6-ئۆكتەبىردە ئىككىنچى قېتىملىق ئاممىۋى نامايىشقا چاقىرىق قىلدى.
16 ياشلىق ئوقۇغۇچى بىر كۆزىدىن ئايرىلدى
«France Info» نىڭ خەۋەر قىلىشىچە، فىرانسىيەنىڭ ئوتتۇرا قىسمىدىكى توئۇرس (Tours) شەھىرىدە نامايىش جەريانىدا يارىلانغان 16 ياشلىق بىر ئوقۇغۇچىنىڭ بىر كۆزى كۆرۈش ئىقتىدارىدىن ئايرىلغان.
ئوقۇغۇچىنىڭ فىرانسىيە ساقچىلىرى تەرىپىدىن ئىشلىتىلگەن LBD-40 تىپلىق مۇداپىئە ئوقى ئاتىدىغان قورال بىلەن يارىلانغانلىقى بىلدۈرۈلدى.
بۇرۇنقى نامايىشلاردىمۇ ئېغىر يارىلىنىشلارغا سەۋەب بولغانلىقى ئۈچۈن تالاش-تارتىش قوزغىغان بۇ قورالنىڭ ئىشلىتىلىشى تەنقىد قىلىنغان ئىدى.
«La Nouvelle Republique» گېزىتى، 16 ياشلىق ئوقۇغۇچىنىڭ ھازىرمۇ دوختۇرخانىدا داۋالىنىۋاتقانلىقىنى ۋە جۈمە كۈنى دۆلەتلىك ساقچى باش نازارەتچىلىك ئىدارىسى تەرىپىدىن ئىپادىسىنىڭ ئېلىنغانلىقىنى بىلدۈردى.
ساقچى خادىمى ئوقۇغۇچىنى بوغۇشقا ئۇرۇنۇش بىلەن ئەيىبلەندى
ئامېرىكىنى مەركەز قىلغان X ئىجتىمائىي ئالاقە سۇپىسىدا جۈمە كۈنى «Alertes Infos» تەرىپىدىن ھەمبەھىرلەنگەن كۆرۈنۈشلەردە، بېلفورت (Belfort) تا بىر ساقچى خادىمىنىڭ بىر نامايىشچىنىڭ بېشىنى سۇنىڭ ئاستىدا تۇتۇپ تۇرغانلىقى كۆرۈلدى.
«Alertes Infos»، كۆرۈنۈشلەردە ساقچىنىڭ «ياشنىڭ بېشىنى ئۇزۇن سېكۇنتلارغىچە سۇنىڭ ئاستىدا تۇتۇپ تۇرغانلىقىنىڭ كۆرۈلگەنلىكىنى» بىلدۈردى.
ئەمما بېلفورت جۇمھۇرىيەت تەپتىشى پاۋل-ئېدۇارد لاللوئىس (Paul-Edouard Lallois)، ساقچىنىڭ بىر نامايىشچىنى بوغۇشقا ئۇرۇنغانلىقى توغرىسىدىكى دەۋالارنى رەت قىلدى.
لاللوئىس ساقچى خادىمىنىڭ ئوت قويۇشقا ئۇرۇنغانلىقى ئىلگىرى سۈرۈلگەن بىر گۇماندارنى نازارەتكە ئېلىشنى ئويلىغانلىقىنى، نىشان قىلىنماسلىق ئۈچۈن باشقا بىر نۇقتىغا ئۆتۈۋاتقان ئەسنادا گۇماندارنىڭ قارشىلىق كۆرسەتكەنلىكىنى ئېيتتى.
تەپتىش خادىمى ساقچى خادىمىنىڭ كويزا سېلىشقا ئۇرۇنۇۋاتقاندا ئىككىيلەننىڭ تەڭپۇڭلۇقىنى يوقىتىپ دەرياغا چۈشۈپ كەتكەنلىكىنى، خادىمنىڭ كېيىنرەك ياشنى سۇدىن چىقىرىپ كويزا سالغانلىقىنى بىلدۈردى.
سولچىل «بويسۇنماس فىرانسىيە» پارتىيەسىنىڭ پارلامېنت ئەزاسى ئانتوئىن لېئائۇمېنت (Antoine Leaument) بولسا كۆرۈنۈشلەرگە نارازىلىق بىلدۈرۈپ X تە ئىچكى ئىشلار مىنىستىرى نۇنېزنى ئەسكەرتتى.
لېئائۇمېنت مىنىستىرغا «مەسئۇلىيىتىڭىز ئاستىدىكى كىشىلەنى تەمكىن بولۇشقا چاقىرىق قىلىڭ» دەپ خىتاب قىلدى.
لېئائۇمېنت: «بۇ ئارىلىشىش ئاممىۋى تەرتىپنى قوغداش قائىدىلىرىنىڭ ھېچبىرىگە ئۇيغۇن ئەمەس. ھېچبىرىگە» دېگەن سۆزلەرنى ئىشلەتتى.
