پاكىستان قىسىملىرى ئاممىۋى مۇناسىۋەت بۆلۈمى (ISPR) نىڭ ئاممىۋى ئورتاقلىشىش تور بېتىدىكى سەھىپىسىدە ئېلان قىلغان باياناتىدا، دۆلەت خەۋپسىزلىك كۈچلىرىنىڭ ئىستىخبارات ئۇچۇرىغا ئاساسەن، ئۆلكىگە قاراشلىق گۋادار ۋە قەلات رايونلىرىدا ئىككى ئايرىم ھەربىي ھەرىكەت ئېلىپ بېرىلغانلىقى بىلدۈرۈلدى.
باياناتتا، قەلاتتا ئېلىپ بېرىلغان ھەربىي ھەرىكەتتە، ھىندىستان قوللاۋاتقانلىقى ئىلگىرى سۈرۈلگەن 4 قوراللىق ئۇنسۇرنىڭ بىر تەرەپ قىلىنغانلىقى، كۆپ ساندا قورال-ياراغ ۋە ئوق-دورانىڭ قولغا چۈشۈرۈلگەنلىقى قەيت قىلىندى.
گۋادار رايونىدىكى ھەربىي ھەرىكەت جەريانىدا بولسا، قولدا ياسالغان پارتلاتقۇچنىڭ پارتلىشى نەتىجىسىدە دۆلەت خەۋپسىزلىك كۈچلىرىدىن بىر ئەسكەرنىڭ ھاياتىدىن ئايرىلغانلىقى ئەسكەرتىلگەن باياناتتا، ئارمىيەنىڭ بەلۇجىستاندىكى تېررورىزمغا قارشى كۈرەش ھەرىكەتلىرىنى قەتئىي داۋاملاشتۇرىدىغانلىقى تەكىتلەندى.
پاكىستاندىكى تېررورىزم مەسىلىسى
پاكىستاندىكى قوراللىق ھۇجۇملار، بولۇپمۇ ئافغانىستانغا چېگرىداش بولغان خەيبەر-پاختونخۋا ۋە بەلۇجىستان ئۆلكىلىرىدە ئەۋج ئالماقتا.
ھەر ئىككى ئۆلكىدە پەشتۇن ۋە بەلۇج مىللەتلىرىنىڭ ھەق - ھوقۇقلىرىنى قوغداۋاتقانلىقىنى ئىلگىرى سۈرۈۋاتقان قوراللىق گۇرۇھلار، پاكىستان دۆلەت خەۋپسىزلىك كۈچلىرى ۋە پۇقرالارنى نىشان قىلغان ھۇجۇملارنى سادىر قىلماقتا.
ئىسلامئاباد دائىرىلىرى پاكىستان تالىبانلىرى (TTP) نىڭ ئافغانىستاندا لاگېر قۇرغانلىقىنى ۋە ھۇجۇملىرىنى شۇ يەردىن تەشكىللەۋاتقانلىقىنى ئىلگىرى سۈرمەكتە، ئافغانىستان ھۆكۈمىتى بولسا بۇ ئەيىبلەشلەرنى رەت قىلماقتا.
بەلۇجىستاندا بولسا «بەلۇجىستان ئازادلىق ئارمىيەسى» (BLA) نىڭ ھۇجۇملىرى كۆزگە چېلىقماقتا. «بەلۇجىستان ئازادلىق ئارمىيەسى» نىڭ بەلۇجىستاننىڭ پاكىستاندىن ئايرىلىپ چىقىشىنى ۋە بەلۇج خەلقىنىڭ بۇ رايوننى ئۆزى باشقۇرۇشىنى تەلەپ قىلماقتا.
