ئىراننىڭ «مەھر» خەۋەر ئاگېنتلىقىنىڭ خەۋەر قىلىشىچە، ئىران ئارمىيەسىنىڭ باياناتچىسى، بىرىگادا گېنېرالى مۇھەممەد ئەكرەمىنىيا بىر رادىيو پىروگراممىسىدا ئامېرىكانىڭ ھۇجۇم تەھدىتلىرى ھەققىدە توختالغان. ئۇنىڭ ئېيتىشىچە، بۇ خىل تەھدىتلەرگە تاقابىل تۇرۇش ئۈچۈن ئىران تەرەپ «دۈشمەن نىشانلىرى تىزىملىكى»نى يېڭىلىغان بولۇپ، قوراللىق كۈچلەرنىڭ مۇداپىئە كۆرۈش ۋە ھۇجۇم قىلىش ئىقتىدارىنى تېخىمۇ كۈچەيتكەن.
ئەكرەمىنىيا سۆزىدە: «ئەگەر ئامېرىكا يەنە تاجاۋۇز قىلسا، بىز دەرھال بۇرۇنقىدىنمۇ كەڭ كۆلەملىك ۋە ۋەيران قىلغۇچ قايتۇرما زەربە بېرىمىز. يېڭى بىر ئۇرۇش پارتلاپ قالسا، ئۇرۇش مەيدانى پەقەت غەربىي ئاسىيا بىلەنلا چەكلىنىپ قالمايدۇ» دېگەنلەرنى قەيت قىلغان.
ئىلگىرىكى خەۋەرلەردە دېيىلىشىچە، ئىراننىڭ ئالىي دىنىي رەھبىرى ئايەتۇللاھ مۇجتەبا خامەنېي 31-ئۆكتەبىر كۈنى ئىران قوراللىق قىسىملىرى باش ئىشتابى باشلىقى، مايور گېنېرال ئەلى ئابدۇللاھى، ئىران ئارمىيەسى باش قوماندانى، مايور گېنېرال ئەمىر ھاتەمى ۋە ئىسلام ئىنقىلابى مۇھاپىزەتچىلىرى قوشۇنى باش قوماندانى، مايور گېنېرال ئەھمەد ۋەھىدى قاتارلىق يۇقىرى دەرىجىلىك ھەربىي ئەمەلدارلار بىلەن كۆرۈشكەن. خامەنېي بۇ قېتىملىق ئۇچرىشىشتا قوراللىق قىسىملارغا دۈشمەننىڭ ھەر قانداق ھۇجۇمىغا قارىتا «جۇغراپىيەلىك چەكلىمىلەرگە قارىماي، دەرھال ۋە ئۈنۈملۈك قايتۇرما زەربە بېرىش»نى بۇيرۇغان.
