سەھىيە ۋە يەرلىك مەنبەلەرگە ئاساسلانغاندا، ئىسرائىلىيەنىڭ غەززەنىڭ ئوخشىمىغان رايونلىرىغا قىلغان ئايرىم ئايرىم ھۇجۇملىرىدا، يۇقىرى دەرىجىلىك بىر ساقچى مەسئۇلىنىمۇ قوشقاندا ئىككى پەلەستىنلىك ھاياتىدىن ئايرىلىپ، ئاز دېگەندىمۇ 14 كىشى يارىلانغان.
شەنبە كۈنى ئېلىپ بېرىلغان ھۇجۇملار، 2025-يىلى 10-ئۆكتەبىردىن بۇيقى ئۇرۇش توختىتىش كېلىشىمىنىڭ ئىسرائىلىيە تەرىپىدىن ھەر كۈنى ئاياق ئاستى قىلىنىشىنىڭ ئەڭ ئاخىرقى ئۆرنەكلىرى ئارىسىدىن ئورۇن ئالدى.
غەززە ئىچكى ئىشلار مىنىستىرلىقى غەززە شەھىرىنىڭ شىمالىي غەربىدىكى شەيخ رىزۋان مەھەللىسىدە ئېلىپ بېرىلغان ئىسرائىلىيە ھاۋا ھۇجۇمىدا غەززەنىڭ شىمالىدىكى ساقچى تەشكىلاتىنىڭ باشلىقى 54 ياشلىق ئابدۇنناسېر مۇھەممەت ئەل-مۇقاددىمەنىڭ ئۆلتۈرۈلگەنلىكىنى ئېلان قىلدى.
غەززەنىڭ شىمالىدىكى ئەبۇ شارخ رايونىدا بىر ئاپتوموبىلغا قىلىنغان ئۇچقۇچىسىز ئاپپارات ھۇجۇمىدىمۇ بىر پەلەستىنلىك ئېغىر يارىلاندى.
سەھىيە مەنبەسى، پەلەستىنلىك ساقچى خادىمى يامەن ئۇبەيدنىڭ 14-ئىيۇلدا ئېلىپ بېرىلغان ئىسرائىلىيە ھۇجۇمىدا يارىلانغانلىقىنى ۋە يارا سەۋەبىدىن ھاياتىدىن ئايرىلغانلىقىنى بىلدۈردى.
غەززە سەھىيە مىنىستىرلىقى، ئىسرائىلىيەنىڭ ھاۋا ھۇجۇملىرى ۋە ئوق چىقىرىش ھەرىكەتلىرىنى ئۆز ئىچىگە ئالغان ئۇرۇش توختىتىش كېلىشىمىگە خىلاپلىق قىلىش قىلمىشلىرىدا 1191 پەلەستىنلىكنىڭ ئۆلتۈرۈلگەنلىكىنى، 3853 پەلەستىنلىكنىڭ يارالانغانلىقىنى ئېلان قىلدى.
ئىسرائىلىيەنىڭ 2023-يىلى ئۆكتەبىردىن بۇيان غەززەدە داۋاملاشتۇرۇۋاتقان قىرغىنچىلىقىدا 73 مىڭدىن ئارتۇق پەلەستىنلىك ھاياتىدىن ئايرىلدى، 173 مىڭدىن ئارتۇق كىشى يارىلاندى. كەڭ كۆلەملىك ۋەيرانچىلىق، رايوندىكى ئاممىۋى ئۇل ئەسلىھەلەرنىڭ %90 دىن كۆپرەكىنى ۋەيران قىلدى.
