نىگېرىيەنىڭ زامفارا ئىشتاتىدا ئارمىيەنىڭ قوغدىشى ئاستىدا سەپەر قىلىۋاتقان سودىگەرلەر ئاپتوموبىل ئەترىتىگە قىلىنغان ھۇجۇمدا 27 كىشى ھاياتىدىن ئايرىلدى.
دۆلەتلىك تاراتقۇلارنىڭ خەۋىرىگە قارىغاندا، قوراللىق شايكا ئەزالىرى تۈنۈگۈن زامفارا ئىشتاتىدىكى گۇرۇسۇ-گۋاشى تاشيولىدا ھەپتىلىك بازارغا بېرىش ئۈچۈن ھەربىيلەر قوغداپ كېتىۋاتقان سودىگەرلەر ئاپتوموبىل ئەترىتىنى نىشان قىلغان.
ھۇجۇمدا دۆلەت خەۋپسىزلىك كۈچلىرى ئەزالىرىنىمۇ ئۆز ئىچىگە ئالغان 27 كىشى ھاياتىدىن ئايرىلغان، نۇرغۇن كىشى يارىلانغان. زامفارا ساقچى تەرەپ ھۇجۇمنى جەزملەشتۈرۈپ، ۋەقەگە مۇناسىۋەتلىك تەكشۈرۈش باشلانغانلىقىنى بىلدۈرگەن.
نىگېرىيەنىڭ ئوخشىمىغان رايونلىرى ئۇزۇن يىللاردىن بۇيان قوراللىق شايكىلار بىلەن بىرلىكتە تېررورلۇق تەشكىلاتى بوكو ھارام ۋە دائېشنىڭ غەربىي ئافرىقادىكى گۇماشتىسى ISWAP نىڭ ھۇجۇملىرىغا دۇچ كەلمەكتە.
دۆلەتتە ئادەم تۇتقۇن قىلىش جىنايىتىگە ئۆلۈم جازاسى بېرىلىشىگە قارىماي، تۆلەم ئۈچۈن تۇتقۇن قىلىش ۋەقەلىرى دائىم يۈز بېرىپ تۇرىدۇ. قوراللىق كىشىلەر ئادەتتە دۆلەتنىڭ شىمالىدىكى يېزا، مەكتەپ ۋە يولۇچىلارنى نىشان قىلىپ، تۆلەم تەلەپ قىلىدۇ.
