ئىسرائىلىيە ئىشغالىيەت ئاستىدىكى شەرقىي قۇددۇستا پەلەستىنلىك مۇساپىرلارغا خىزمەت قىلىدىغان بىرلەشكەن دۆلەتلەر تەشكىلاتى يېقىن شەرقتىكى پەلەستىن مۇساپىرلىرىغا ياردەم بېرىش – خىزمەت ئىشلەش ئورگىنى (UNRWA) غا تەۋە كەلەندىيە مائارىپ مەركىزىنى بېسىۋالدى. پەلەستىن ھاكىمىيىتىگە قاراشلىق قۇددۇس ۋالىي مەھكىمىسىنىڭ بىلدۈرۈشىچە، ئىسرائىلىيە ئارمىيەسى مەركەزدىكى بارلىق خادىملارنى مەجبۇرىي چىقىرىۋەتكەن ۋە ئۇلارنىڭ بۇ يەرگە قايتىپ كېلىشىنى مۇددەتسىز مەنئىي قىلغان.

ئىسرائىلىيە تاشقى ئىشلار مىنىستىرلىقى بولسا بۇ تاجاۋۇزچىلىقنى ئاقلاش ئۈچۈن، قۇددۇس شەھەرلىك ھۆكۈمىتىنىڭ بۇ يەردە يېڭى بىر مائارىپ ۋە ئىجتىمائىي ئەسلىھە قۇرۇشنى پىلانلاۋاتقانلىقىنى ئىلگىرى سۈردى. ئىسرائىلىيە دائىرىلىرى يەنە UNRWA نىڭ بۇ يەر ئۈستىدە ھېچقانداق مال - مۈلۈك ھوقۇقى يوقلۇقىنى دەۋا قىلدى.

ئىسرائىلىيە پارلامېنتى 2024-يىلى ئۆكتەبىردە UNRWA نىڭ پائالىيەتلىرىنى چەكلەيدىغان قانۇن لايىھەسىنى ماقۇللىغان بولۇپ، بۇ قارار 2025-يىلى يانۋاردا كۈچكە ئىگە بولغان ئىدى. ئىسرائىلىيە ئارمىيەسى 2026-يىلى يانۋار ئېيىدا UNRWA نىڭ باش ئىش بېجىرىش ئورنىغىمۇ بېسىپ كىرىپ، ئۇ يەردىكى ئەسلىھەلەرنى ۋەيران قىلغان ئىدى. بۇ خىل بېسىۋېلىش ھەرىكەتلىرى پەلەستىن زېمىنىدىكى 2 مىليون 500 مىڭدىن ئارتۇق مۇساپىرنىڭ تۇرمۇشىغا ۋە مائارىپىغا ئېغىر تەھدىت ئېلىپ كەلمەكتە.