تىرامپ تەرەپلەرنىڭ سۆھبەتلىشىش ئارقىلىق تىنچلىق كېلىشىمىگە كېلىشىنى ئۈمىد قىلىدىغانلىقىنى ئېيتتى.
ئامېرىكا پىرېزىدېنتى دونالد تىرامپ ئۇكرائىنا بىلەن رۇسىيە ئوتتۇرىسىدىكى ئۇرۇش ئاخىرلاشقاندىن كېيىن ۋاشىنگتوننىڭ ھەر ئىككى دۆلەت بىلەن سودا مۇناسىۋەتلىرىنى قانات يايدۇرۇشقا تەييار ئىكەنلىكىنى ئېيتتى.
ئىككى دۆلەتنىڭ سۆھبەتلىشىش ئارقىلىق تىنچلىق كېلىشىمى ھاسىل قىلىشىنى ئۈمىد قىلىدىغانلىقىنى بىلدۈرگەن تىرامپ، توقۇنۇشلارنىڭ ئاخىرلىشىشى بىلەن ئىقتىسادىي مۇناسىۋەتلەرنىڭ قايتىدىن جانلىنىدىغانلىقىنى تەكىتلىدى.
رۇسىيەنىڭ ئالياسكادىكى تەبىئىي گاز ساھەسىگە مەبلەغ سېلىش ئارزۇسى توغرىسىدىكى سۇئاللارغا جاۋاب بەرگەن تىرامپ، مەزكۇر مەبلەغ تەكلىپىگە قارىتا ئالاھىدە بىر كۆز قارىشى يوقلۇقىنى، ئەمما ئۇرۇش ئاخىرلاشقاندىن كېيىن تېخىمۇ كەڭ دائىرىلىك ئىقتىسادىي مۇناسىۋەتلەرنىڭ قايتىدىن ئورنىتىلىشى مۇمكىنلىكىنى بىلدۈردى.
تىرامپ: «بۇ ئۇرۇش ئاخىرلاشقاندىن كېيىن ھەم ئۇكرائىنا ھەم رۇسىيە بىلەن قەتئىي يوسۇندا سودا قىلىمىز» دېدى.
توقۇنۇشلارنىڭ تېزراق ئاخىرلىشىشىنى خالايدىغانلىقىنى تەكىتلىگەن تىرامپ: «رۇسىيە بىلەن ئۇكرائىنا كېلىشىم ھاسىل قىلغان ۋە بىزنىڭمۇ ھەر ئىككى دۆلەت بىلەن سودا قىلالايدىغان نورمال ھاياتقا قايتىشنى خالايمەن» دېگەن سۆزلەرنى ئىشلەتتى.
تەبىئىي بايلىقلار كېلىشىمى
تىرامپ ئۇكرائىنانىڭ تەبىئىي بايلىقلىرىغا ئاساسلىنىپ كىيېۋ ھۆكۈمىتى بىلەن تۈزۈلۈشى مۇمكىن بولغان سودا كېلىشىمىنىڭ قىممىتىنىڭ 1 تىرىليون دوللارغا يېتىشى مۇمكىنلىكىنى ئوتتۇرىغا قويدى.
ئېھتىماللىقى بولغان تەبىئىي بايلىقلار كېلىشىمىنى، ئامېرىكانىڭ سابىق پىرېزىدېنتى جو بايدىن مەزگىلىدە ئۇكرائىناغا قىلىنغان ھەربىي ۋە ئىقتىسادىي ياردەملەرگە باغلىغان تىرامپ، ۋاشىنگتوننىڭ بۇ ياردەمنىڭ بەدىلىگە ئىقتىسادىي تۆلەم تەلەپ قىلىشى كېرەكلىكىنى تەشەببۇس قىلدى.
تىرامپ: «ئۆزۈمنى ناداندەك ھېس قىلىۋاتىمەن، چۈنكى قىلىشقا تېگىشلىك بىردىنبىر ئىش بۇنى ئۇلاردىن تەلەپ قىلىش ئىدى، تۆلەيتتى. يەنى ياۋروپا ئىتتىپاقى تۆلەيتتى» دېدى.
