غەززە رايونىدىكى ئىزدەش-قۇتقۇزۇش ئەترەتلىرى ئىسرائىلىيە ئارمىيەسىنىڭ ئىرقىي قىرغىنچىلىق ھۇجۇملىرى جەريانىدا ئاھالىلەرنىڭ ئۈستىگە گۈمۈرۈلۈپ چۈشكەن 20 ئۆي خارابىلىكىنىڭ ئاستىدىن 233 پەلەستىنلىكنىڭ جەسىتىنى چىقاردى.
غەززەدىكى پۇقراۋى مۇداپىئە ئەترەتلىرىنىڭ خارابىلىك ئاستىدىكى جەسەتلەرنى چىقىرىش خىزمىتىگە مەسئۇل پولكوۋنىك مۇھەممەد ئەبۇ دان ئېلان قىلغان يازما باياناتىدا، ئىسرائىلىيەنىڭ ھۇجۇملىرىدا ۋەيران بولغان ئۆيلەرنىڭ خارابىلىكلىرىدە ئىزدەش-قۇتقۇزۇش خىزمىتىنى داۋاملاشتۇرۇۋاتقانلىقىنى بىلدۈردى. پولكوۋنىك ئەبۇ دان ئىسرائىلىيە ۋەيران قىلغان مەزكۇر 20 ئۆي خارابىلىكى ئاستىدا 407 پەلەستىنلىكنىڭ يوقاپ كەتكەنلىكىنى، ھازىرغىچە بۇلاردىن 233 كىشىنىڭ جەسىتىنى چىقارغانلىقىنى ئەسكەرتتى.
ھاياتىدىن ئايرىلغانلار سانى 73 مىڭ 438گە يەتتى
ئىسرائىلىيە بومباردىمان قىلغان ئۆيلەرنىڭ خارابىلىكلىرىدىن چىقىرىلغانلاردىن 73ىسىنىڭ بالا، 106سىنىڭ ئايال ئىكەنلىكىنى بايان قىلغان ئەبۇ دان، ئىزدەش-قۇتقۇزۇش ئەترەتلىرىنىڭ ئىنتايىن چەكلىك شارائىتتا 381 سائەت داۋاملاشقان خىزمىتى نەتىجىسىدە مەزكۇر پۇقرالارنىڭ جەسىتىنى تاپقانلىقىنى قەيت قىلدى.
ئىسرائىلىيەنىڭ 2023-يىلى ئۆكتەبىردىن بۇيان غەززە رايونىغا قىلغان ھۇجۇملىرىدا ھاياتىدىن ئايرىلغانلار ئومۇمىي سانى 73 مىڭ 438گە، يارىلانغانلار سانى بولسا 174 مىڭ 447گە يەتتى.
