ئىسپانىيە باش ۋەزىرى پېدرو سانچېز بارسېلونا پۇتبول كوماندىسى چولپىنى لامىن يامالنىڭ چېمپىيونلۇقنى تەبرىكلەش پائالىيەتلىرى داۋامىدا پەلەستىن بايرىقىنى لەپىلدىتىشىنىڭ ئىسپانىيەنى «پەخىرلەندۈرگەنلىكىنى» ۋە بۇنىڭ يەنە ئىسرائىلىيەنىڭ «نەپرەتنى قوزغاش» دېگەن ئاساسسىز ئەيىبلىشىگە سەۋەب بولغانلىقىنى ئېيتتى.

18 ياشلىق ئالدىنقى سەپ ھۇجۇمچىسى يامال، كوماندىسى ئارقىمۇئارقا قولغا كەلتۈرگەن ئىككىنچى قېتىملىق لا لىگا (La Liga) چېمپىيونلۇقىنى تەبرىكلىگەن دۈشەنبە كۈنى، بارسېلونادا ئۈستى ئوچۇق بىر ئاپتوبۇس بىلەن ئۆتكۈزۈلگەن تەبرىكلەش پائالىيەتلىرى داۋامىدا پەلەستىن بايرىقىنى لەپىلدىتىپ دىققەت قوزغىدى.

ئىسرائىلىيە دۆلەت مۇداپىئە مىنىستىرى ئىسرائىل كاتز پەيشەنبە كۈنى، بارسېلونا پۇتبول كوماندىسىنىڭ چولپىنىنى قاتتىق تەنقىد قىلىپ ئىنكاس قايتۇردى ۋە ئۇنىڭ ئۆز دۆلىتىگە قاراتقان «نەپرەت قوزغاش» يولىنى تاللىغانلىقىنى ئىلگىرى سۈردى. مىنىستىر ئاممىۋى ئورتاقلىشىش تور بېتى X سەھىپىسىدە ئىسپان تىلىدا ئېلان قىلغان  باياناتىدا: «بارسېلوناغا ئوخشاش چوڭ ۋە ھۆرمەتكە سازاۋەر بىر پۇتبول كۇلۇبىنىڭ بۇ باياناتلاردىن ئۆزىنى قاچۇرۇشىنى ھەمدە تېررورىزمنىڭ ئىغۋاگەرچىلىك قىلىنىشىغا ياكى قوللىنىشىغا ئورۇن يوقلۇقىنى ئوچۇق-ئاشكارا ھالدا ئوتتۇرىغا قويۇشىنى ئۈمىد قىلىمەن» دېدى.

ئىسرائىلىيەنىڭ غەززەدىكى قىلمىشلىرىنى «ئىرقىي قىرغىنچىلىق» دەپ ئاتىغان ۋە ئىسرائىلىيەنى ئوچۇق-ئاشكارا تەنقىد قىلغان سانچېز بولسا، بۇ ئۇچۇرغا يامالنى ھىمايە قىلىش بىلەن جاۋاب قايتۇردى.

ئىسپانىيە باش ۋەزىرى ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا: «بىر دۆلەتنىڭ بايرىقىنى لەپىلدىتىشنى <نەپرەت قوزغاش> دەپ ئويلايدىغانلار يا ئەقلىنى يوقاتقان، ياكى ئۆزلىرىنىڭ شەرمەندىلىكلىرى تۈپەيلىدىن كور بولۇپ قالغانلاردۇر. لامىن پەقەت مىليونلىغان ئىسپانىيەلىكلەر ھېس قىلغان پەلەستىن بىلەن بولغان ھەمدەملىكنى ئىپادىلىدى. بۇمۇ ئۇنىڭ بىلەن پەخىرلىنىشنىڭ يەنە بىر سەۋەبىدۇر» دېدى.

غەززەدىكى تام رەسىمى

يامالنىڭ ئىسپانىيەدە كەڭ كۆلەمدە ئالقىشقا ئېرىشكەن پەلەستىن دەۋاسىنى قوللىشى، قورشاۋ ئاستىدىكى غەززەدىمۇ دىققەت قوزغىدى.

فىرانسىيە ئاخبارات ئاگېنتلىقى (AFP) نىڭ بىر مۇخبىرى، ناھايىتى زور دەرىجىدە ۋەيران قىلىنغان رايوندىكى بىر مۇساپىرلار لاگېرىدىكى سەنئەتكارلارنىڭ، ۋەيرانچىلىقلار ئۈستىگە يامالنىڭ پەلەستىن بايرىقىنى لەپىلدىتىپ تۇرغانلىقىنى كۆرسىتىدىغان تام رەسىمى سىزغانلىقىنى سۈرەتكە ئالدى.

بارسېلونا كوماندىسىنىڭ تىرېنېرى خەنسى فلىك بولسا يامالنىڭ ھەرىكىتىنى «ياقتۇرمىغانلىقىنى» ئېيتتى، لېكىن «ئەگەر قىلماقچى بولغىنى شۇ بولسا، بۇ ئۇنىڭ ئۆزنىڭ قارارى» دېدى.

ئىسپانىيە بىلەن ئىسرائىلىيە ئوتتۇرىسىدىكى مۇناسىۋەتلەر، 2023-يىلى غەززەدە باشلانغان ئىسرائىلىيەنىڭ ئىرقىي قىرغىنچىلىق ئۇرۇشىدىن كېيىن قاتتىق ناچارلىشىپ كەتتى.

ئىسرائىلىيە مادرىدنىڭ 2024-يىلى پەلەستىننى ئېتىراپ قىلىشىدىن كېيىن باش ئەلچىسىنى قايتۇرۇپ كەتكەن ئىدى؛ ئىسپانىيە بولسا مارت ئېيىدا تېل ئاۋىۋدىكى ئەڭ ئالىي دەرىجىلىك ۋەكىلىنى رەسمىي ھالدا ۋەزىپىسىدىن قالدۇردى.