جۇمھۇر رەئىس رەجەپ تاييىپ ئەردوغان بىتلىستا ئۆتكۈزۈلگەن مالازگىرت غەلىبىسىنىڭ 955-يىللىقىنى خاتىرىلەش پائالىيىتىدە سۆزلىگەن نۇتىقىدا، تۈركىيەنىڭ بىرلىكى ۋە قېرىنداشلىق ئىرادىسىنى نامايان قىلدى. ئەردوغان مالازگىرت غەلىبىسىدىن تارتىپ تېررورىزمغا قارشى كۈرەش ۋە 15-ئىيۇل داستانىغىچە بولغان جەريانلاردا، ۋەتەن ئۈچۈن جېنىنى پىدا قىلغان بارلىق شېھىتلارنى رەھمەت بىلەن ياد ئەتتى. ئۇ نۇتىقىدا تۈرك، كورد، ئەرەب، ئەلەۋى ۋە سۈننىيلەرنىڭ ئوخشاش بىر كەلگۈسى ۋە ئارزۇ ئۈچۈن مۈرىنى مۈرىگە تىرەپ كۈرەش قىلىۋاتقانلىقىنى ئالاھىدە ئەسكەرتتى.
ئەردوغان «تۈركىيە ئەسىرى» ئىستىراتېگىيەسىنىڭ رەسمىي باشلانغانلىقىنى ۋە تېررورىزمدىن خالىي تۈركىيە نىشانىغا يەتكەندە، خەلقنىڭ ئالدىدا يېڭى بىر دەۋرنىڭ ئېچىلىدىغانلىقىنى بىلدۈردى. ئۇ يەنە تېررورىزمدىن مەنپەئەتلىنىۋاتقانلارنىڭ، قان سودىگەرلىرىنىڭ ۋە رايوننى مۇقىمسىزلاشتۇرۇشقا ئۇرۇنۇۋاتقان ئىرقىي قىرغىنچىلىقچىلارنىڭ چوقۇم مەغلۇپ بولىدىغانلىقىنى قەيت قىلدى.
ئەردوغاننىڭ تەكىتلىشىچە، بۇ غەلىبە ئىنسانىيەتنىڭ، قېرىنداشلىقنىڭ، تىنچلىق ۋە مۇقىملىقنىڭ غەلىبىسى بولۇپ، ئۇنىڭدىن 86 مىليون پۇقراسى بىلەن تۈركىيە خەلقى بەھرىمەن بولىدۇ.
جۇمھۇر رەئىس ئەردوغان سۆزىنىڭ ئاخىرىدا، مىللىي بىرلىككە بۇزغۇنچىلىق قىلماقچى بولغانلارغا خىتاب قىلىپ: «نېمە قىلساڭلار قىلىڭلار، بىزنى ھەرگىزمۇ يولىمىزدىن قايتۇرالمايسىلەر، تۈرك، كورد ۋە ئەرەبلەرنىڭ قېرىنداشلارچە قۇچاقلىشىشىغا توسالغۇ بولالمايسىلەر» دېدى. ئۇ يەنە تۈركىيەنىڭ تەرەققىياتى بىلەن بىرگە، پۈتكۈل رايون خەلقلىرىنىڭمۇ ئۇتۇپ چىقىدىغانلىقىنى سۆزلىرىگە ئىلاۋە قىلدى.
