نىگېرىيەنىڭ غەربىي شىمالىدىكى سوكوتو ئىشتاتىدا دېھقانلار ۋە ئىشچىلارنى توشۇۋاتقان بىر كېمىنىڭ ئۆرۈلۈپ كېتىشى  نەتىجىسىدە 52 كىشى ھاياتىدىن ئايرىلدى. نىگېرىيە دۆلەتلىك جىددىي ئەھۋاللارنى باشقۇرۇش ئىدارىسىنىڭ سوكوتو مەشغۇلات ئىشلىرى مەسئۇلى تۇكۇر ئابۇباكار، ھاياتىدىن ئايرىلغانلار ئارىسىدا بىر ئائىلىدىن 11 كىشىنىڭ بارلىقىنى بىلدۈردى.

مەزكۇر پاجىئە پەيشەنبە كۈنى سوكوتو ئىشتاتىنىڭ گورونيو رايونىغا قاراشلىق گوراۋ بازىرىدا يۈز بەردى. تەخمىنەن 70 كىشىنى توشۇۋاتقان كېمە، دېھقانلار ۋە ئىشچىلارنىڭ كۈرۈچ ئېتىزلىرىغا بېرىش ئۈچۈن سۇ يولىدىن ئۆتۈۋاتقان ۋاقتىدا ئۆرۈلۈپ كەتكەن.

سوكوتو ئىشتاتلىق مەجلىس ئەزاسى ناسىرۇ ئادامۇ، ۋەقەدىن كېيىن ئېلان قىلغان تۇنجى باياناتىدا 40 تىن ئارتۇق كىشىنىڭ ھاياتىدىن ئايرىلغانلىقىنى، قۇتقۇزۇش ئەترەتلىرىنىڭ 16 كىشىنى قۇتقۇزۇۋالغانلىقىنى، كېمىدىكى يولۇچىلارنىڭ كۆپىنچىسىنىڭ 10 ياشتىن 15 ياشقىچە بولغان بالىلاردىن تەشكىل تاپىدىغانلىقىنى ئەسكەرتكەن ئىدى.

نىگېرىيەدە كېمىلەرگە سىغىمىدىن ئارتۇق يولۇچى قوبۇل قىلىش، كېمىلەرنىڭ ئاسرىلىشى ياخشى بولماسلىق ۋە بىخەتەرلىك قائىدىلىرىگە يېتەرلىك ئەمەل قىلماسلىق سەۋەبىدىن، بولۇپمۇ يامغۇرلۇق مەۋسۇملاردا كېمە ھادىسىلىرى پات-پات يۈز بېرىپ تۇرىدۇ.