رۇسىيە تاشقى ئىشلار مىنىستىرلىقى باياناتچىسى مارىيا زاخاروۋا ئەنگلىيەنى رۇسىيە-ئۇكرائىنا ئۇرۇشىدىكى پوزىتسىيەسىدىن چېكىنىشكە چاقىرىپ، بۇ ۋەزىيەتنىڭ توقۇنۇشنى تۈپتىن يېڭى بىر باسقۇچقا ئېلىپ چىقىش خەۋپى بارلىقىنى بىلدۈردى.
مارىيا زاخاروۋا پايتەخت موسكۋادا ئۆتكۈزۈلگەن مۇخبىرلارنى كۈتۈۋېلىش يىغىنىدا، ئەنگلىيە ۋە فىرانسىيەنىڭ ئۇكرائىناغا سەزگۈر باشقۇرۇلىدىغان بومبا تېخنىكىسى بىلەن تەمىنلەپ «ئوت بىلەن ئوينىشىۋاتقانلىقى» نى ئېيتتى.
ئەنلگىيە دۈشەنبە كۈنى ئېلان قىلغان باياناتىدا، رۇسىيە زېمىنىنىڭ ئىچكىرى قىسىملىرىغا زەربە بېرىش ئىقتىدارىغا ئىگە «Storm Shadow» تىپلىق ئۇزۇن مۇساپىلىك باشقۇرۇلىدىغان بومبىلارنى ئۇكرائىنانىڭ ئۆزى ئىشلەپچىقىرىشى ئۈچۈن، كىيېۋنىڭ مەخپىي تېخنىكىلاردىن پايدىلىنىشىغا رۇخسەت قىلىدىغانلىقىنى جاكارلىغان ئىدى.
ئەنگلىيە دۆلەت مۇداپىئە مىنىستىرلىقى «ئۇكرائىنا بىلەن مۈرىنى مۈرىگە تىرەپ كۈرەش قىلىدىغانلىقىنى» ۋە «رۇسىيە پىرېزىدېنتى ۋلادىمىر پۇتىننىڭ قانۇنسىز بېسىۋېلىشىغا قارشى» ئۇكرائىنانىڭ ئۆزىنى قوغداش ئۈچۈن ئېھتىياجلىق بولغان بارلىق قورال-ياراغلار بىلەن تەمىنلەشكە قەتئىي ئىرادىلىك ئىكەنلىكىنى بىلدۈردى.
