ئىسرائىلىيەنىڭ ھۇجۇملىرى سەۋەبىدىن پەقەت ئاخىرقى 24 سائەت ئىچىدە غەززەدە 3 پەلەستىنلىك ھاياتىدىن ئايرىلدى. شۇنىڭ بىلەن 2023-يىلى ئۆكتەبىردىن بۇيان ئۆلگەنلەرنىڭ سانى 74 مىڭ 392 گە يەتتى.
ئىسرائىلىيە ئارمىيەسىنىڭ غەززەدە ئۇرۇش توختىتىش كېلىشىمى كۈچكە ئىگە بولغان ئاخىرقى بىر يىلدا ئېلىپ بارغان ھۇجۇملىرىدا 1501 پەلەستىنلىك ھاياتىدىن ئايرىلدى.
غەززەدىكى سەھىيە مىنىستىرلىقى تەرىپىدىن ئېلان قىلىنغان باياناتتا، ئاخىرقى 24 سائەتتە ئىسرائىلىيەنىڭ ھۇجۇملىرى تۈپەيلى يەنە 3 پەلەستىنلىكنىڭ قازا قىلغانلىقى، 17 كىشىنىڭ يارىلانغانلىقى بىلدۈرۈلدى.
ئۇرۇش توختىتىش يولغا قويۇلغان 2025-يىلى 10-ئۆكتەبىردىن بۇيان ئىسرائىلىيە ئارمىيەسىنىڭ ھۇجۇملىرىدا ھاياتىدىن ئايرىلغان پەلەستىنلىكلەر سانىنىڭ 1501 گە، يارىلانغانلار سانىنىڭ 5 مىڭ 323 كە يەتكەنلىكى قەيت قىلىندى. بۇنىڭدىن باشقا، ھازىرغىچە ئىسرائىلىيەنىڭ ھۇجۇملىرى نەتىجىسىدە خارابىلىكلەر ئاستىدا قالغان 838 پەلەستىنلىكنىڭ جەسىتى چىقىرىلغان.
ئىسرائىلىيە غەززەگە ھۇجۇم باشلىغان 2023-يىلى ئۆكتەبىردىن بۇيان ھاياتىدىن ئايرىلغان پەلەستىنلىكلەرنىڭ سانى 74 مىڭ 392 گە، يارىلانغانلارنىڭ سانى 175 مىڭ 440 قا يەتكەنلىكى ئۇقتۇرۇلدى. ئىسرائىلىيەنىڭ ھەر كۈنى دېگۈدەك ئېلىپ بارغان ھۇجۇملىرى بىلەن ئۇرۇش توختىتىش كېلىشىمىگە خىلاپلىق قىلىۋاتقان غەززە رايونىدا، خارابىلىكلەر ئاستىدا يەنە مىڭلىغان جەسەتنىڭ بارلىقى تەخمىن قىلىنماقتا.
