ئامېرىكا مەركىزىي ئىستىخبارات ئىدارىسىنىڭ باشلىقى جون راتكلىفنىڭ رۇسىيە فېدېراتسىيە بىخەتەرلىك ئىدارىسى (FSB) نىڭ باشلىقى ئالېكساندر بورتنىكوۋغا رۇسىيەنىڭ ئۇكرائىنا بىلەن كېلىشىم تۈزۈشى ھەققىدە چاقىرىق قىلغانلىقى ئىلگىرى سۈرۈلدى.
«The New York Times» گېزىتىنىڭ ئىسمى ئاشكارىلانمىغان نۆۋەتتىكى ۋە سابىق ئەمەلدارلارنىڭ سۆزىنى مەنبە كۆرسىتىپ ئېلان قىلغان خەۋىرىدە، CIA باشلىقى راتكلىفنىڭ ئالدىنقى كۈنلەردىكى موسكۋا زىيارىتىگە دائىر بىر قاتار دەۋالار بايان قىلىندى.
خەۋەردە ئىلگىرى سۈرۈلۈشىچە، راتكلىف رۇسىيە تەرەپنى «ھەربىي ۋە ئىقتىسادىي ۋەزىيەتلەر تېخىمۇ يامانلىشىپ كېتىشتىن بۇرۇن (ئۇكرائىنا بىلەن) بىر كېلىشىم ھاسىل قىلىشقا رىغباتلەندۈرۈش ئۈچۈن» موسكۋاغا بارغان.
راتكلىفنىڭ مەزكۇر ئۇچۇرنى FSB باشلىقى بورتنىكوۋغا يەتكۈزگەنلىكى قەيت قىلىنغان خەۋەردە، CIA باشلىقىنىڭ رۇسىيە تەرەپكە ئەگەر ئۇرۇشنى داۋاملاشتۇرۇشنى تاللىسا، بۇنىڭدىن كېلىپ چىقىدىغان ئاقىۋەتلەر ھەققىدە ھېچقانداق «تەھدىت سالمىغانلىقى» ئوتتۇرىغا قويۇلدى.
خەۋەردە يەنە، راتكلىفنىڭ بۇ زىيارىتىنىڭ رۇسىيە بىلەن ئۇكرائىنا ئوتتۇرىسىدىكى «ئۈزۈلۈپ قالغان سۆھبەتلەر» نى قايتىدىن جانلاندۇرۇش تىرىشچانلىقى ئىكەنلىكى ھەققىدە باھالار بېرىلدى.
