پاكىستان ئافغانىستاندىن قوزغالغان ئۇچقۇچىسىز ئايروپىلانلار بايقالغاندىن كېيىن ئافغانىستاندىكى 10 نۇقتىغا ھاۋا ھۇجۇمى ئېلىپ بارغانلىقىنى ئېلان قىلدى.
پاكىستان ئۇچۇر مىنىستىرى ئاتتاۋۇللاھ تارار X ئىجتىمائىي ئالاقە سۇپىسىدا ئېلان قىلغان باياناتىدا، ئافغانىستان تېررىتورىيەسىدىن قوزغالغان بەزى ئۇچقۇچىسىز ئايروپىلانلارنىڭ 23-سېنتەبىر كۈنى پاكىستانغا كىرىشكە ئۇرۇنغانلىقىنى ۋە بۇنى توسۇپ قالغانلىقىنى بىلدۈرۈپ مۇنداق دېدى:
«پاكىستان ئۆزىنى قوغداش ھوقۇقىدىن پايدىلىنىپ، بۇ ئۇچقۇچىسىز ئايروپىلانلارنىڭ قوزغىلىشى ۋە ساقلىنىشى ئۈچۈن ئىشلىتىلىۋاتقان ئافغانىستاندىكى 10 نىشانغا قارىتا ئېنىق ھاۋا ۋە ئۇچقۇچىسىز ئايروپىلان ھۇجۇملىرىنى ئېلىپ باردى.»
ئافغانىستانغا «ھۇجۇملارنى توختىتىڭ» چاقىرىقى
تارار ئافغانىستاندىن پاكىستان تېررىتورىيەسىگە قىلىنغان ھېچقانداق ھۇجۇمغا يول قويمايدىغانلىقىنى بىلدۈرۈپ، «پاكىستاننىڭ ئىگىلىك ھوقۇقىغا قىلىنغان ھەر قانداق بىر تاجاۋۇزچىلىق، دەرھال ۋە قەتئىي بىر جاۋابقا دۇچار بولىدۇ» دېگەن ئۇچۇرنى بەردى.
ئافغانىستان ھۆكۈمىتىنى جىددىي تۈردە ھۇجۇملارنى توختىتىشقا چاقىرغان تارار، «پاكىستان جىددىيچىلىكنى كەسكىنلەشتۈرۈشنىڭ پېيىدە ئەمەس، شۇنداقلا رايون خاراكتېرلىك تىنچلىق، سۆھبەت ۋە ئىجابىي ھەمكارلىققا بولغان ساداقىتىنى داۋاملاشتۇرماقتا. بۇ ساداقەت، ئاجىزلىق ياكى دۈشمەنلەرچە ھەرىكەتلەرگە قارشى چەكسىز سەۋر-تاقەت دەپ خاتا چۈشىنىلمەسلىكى كېرەك» دېگەن ئىبارىلەرگە ئورۇن بەردى.
نېمە ئىش بولغان ئىدى؟
پاكىستانلىق ئەمەلدارلار تۈنۈگۈن ئېلان قىلغان باياناتىدا، ئافغانىستاندىن چېگرا پونكىتلىرىغا قىلىنغان ھۇجۇم ۋە سىڭىپ كىرىش ئۇرۇنۇشلىرىنى توسۇپ قالغانلىقىنى ئېلان قىلغان ئىدى.
يەنە بىر تەرەپتىن، ئافغانىستان ھۆكۈمىتىنىڭ باياناتچىسى زابىھۇللاھ مۇجاھىد بولسا، بۇنداق بىر ھۇجۇمنىڭ يۈز بەرمىگەنلىكىنى ئېلان قىلغان ئىدى.
