يەمەن ھۆكۈمەت قىسىملىرى شەنبە كۈنى دۆلەتنىڭ ئوتتۇرا قىسمىدىكى نېفىتكە باي مارىب ئۆلكىسىدە خۇسىيلارنىڭ كەڭ كۆلەملىك ھۇجۇمىنى قايتۇرما زەربە بېرىپ چېكىندۈردى.
ھۆكۈمەتكە يېقىن بولغان «West Coast» خەۋەرلەر تورى، ھۇجۇمنىڭ مارىبنىڭ غەربىدىكى ئەل مەشجە ۋە ئەز زۇر رايونلىرىدا چېكىندۈرۈلگەنلىكىنى خەۋەر قىلدى.
خەۋەردە باشقا تەپسىلاتلار بېرىلمىدى، ھۆكۈمەت قىسىملىرىمۇ، خۇسىيلارمۇ مەسىلىگە ئالاقىدار دەرھال ھېچقانداق بايانات ئېلان قىلمىدى.
بۇ ئەھۋال، ھۆكۈمەت قىسىملىرى بىلەن خۇسىيلار ئوتتۇرىسىدا مارىب، ئەل جەۋف، تائىز، ئەد دالى ۋە ئەل بەيدا ئۆلكىلىرىنى ئۆز ئىچىگە ئالغان نۇرغۇن سەپلەردە توقۇنۇشلار داۋاملىشىۋاتقان بىر مەزگىلگە توغرا كەلدى.
ئىجتىمائىي تاراتقۇ ئىشلەتكۈچىلىرى جۈمە كۈنى مارىب چېگراسىدىكى ھەر قايسى سەپلەردە يۈز بەرگەن توقۇنۇشلاردا ئۆلتۈرۈلگەن ياكى ئەسىرگە چۈشكەن ئونلىغان خۇسىي ئەزاسىنىڭ كۆرۈنۈشى ئىكەنلىكى ئىلگىرى سۈرۈلگەن سىنلارنى ھەمبەھىرلىدى.
2014-يىلى خۇسىيلار پايتەخت سانا ۋە باشقا نۇرغۇن ئۆلكىلەرنى ئىشغال قىلغاندىن بۇيان يەمەن ئىچكى توقۇنۇشلاغا پاتقان ھالەتتە تۇرماقتا.
سەئۇدى ئەرەبىستان باشچىلىقىدىكى بىرلەشمە قىسىم بولسا، 2015-يىلى يەمەننىڭ خەلقئارادا ئېتىراپ قىلىنغان قانۇنلۇق ھۆكۈمىتىنى قوللاپ قۇۋۋەتلەش مەقسىتىدە توقۇنۇشلارغا ئارىلاشقان ئىدى.
