تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان، شاڭخەي ھەمكارلىق تەشكىلاتىنى «پارلاۋاتقان بىر يۇلتۇز» دەپ سۈپەتلىدى. ئۇ 3 مىليارد 500 مىليون نوپۇسنى ۋە 35 تىرىليون دوللارلىق مىللىي ئىشلەپچىقىرىش ئومۇمىي قىممىتىنى ئىگىلەيدىغان بۇ تەشكىلاتنىڭ، كۆپ قۇتۇپلۇق دۇنيا تەرتىپىنىڭ ئايرىلماس بىر قىسمى ئىكەنلىكىنى تەكىتلىدى.

جۇمھۇر رەئىس ئەردوغان قىرغىزىستاننىڭ پايتەختى بىشكەكتە ئۆتكۈزۈلگەن شاڭخەي ھەمكارلىق تەشكىلاتى باشلىقلار يىغىنىدا سۆزلىگەن نۇتىقىدا: «تۈركىيە ئەتراپىمىزدا يۈز بېرىۋاتقان توقۇنۇشلارنى دىپلوماتىك يول بىلەن ھەل قىلىش ئۈچۈن مەسئۇلىيەتنى ئۈستىگە ئالماقتا، تىنچلىق ۋە مۇقىملىق ئۈچۈن تىرىشچانلىق كۆرسىتىشنى داۋاملاشتۇرماقتا» دېدى.

ئەردوغان نۇتىقىدا يەنە، ئىسرائىلىيەنىڭ تاجاۋۇزچىلىق سىياسەتلىرى ھەققىدە توختىلىپ، غەززە ۋە لىۋاندا 74 مىڭ كىشىنىڭ ھاياتىدىن ئايرىلغانلىقىنى، بۇ تاجاۋۇزچىلىقنىڭ بەدىلىنى پۈتۈن رايوننىڭ تۆلەۋاتقانلىقىنى ئالاھىدە ئەسكەرتتى.

جۇمھۇر رەئىس ئەردوغان تۈركىيەنىڭ كىلىمات ئۆزگىرىشىگە قارشى كۈرەش قىلىش ئىرادىسىنى بايان قىلىپ، يىغىن قاتناشقۇچىلىرىنى 11-12-نويابىر كۈنلىرى ئانتاليادا ئۆتكۈزۈلىدىغان «بىرلەشكەن دۆلەتلەر تەشكىلاتى كىلىمات ئۆزگىرىشى رامكا ئەھدىنامىسى» نى تۈزگۈچى تەرەپلەرنىڭ 31-قېتىملىق يىغىنىغا (COP31) تەكلىپ قىلدى.