ئىران ئىنقىلابى مۇھاپىزەتچىلىرى ئارمىيەسى، خەۋپسىزلىك كۈچلىرىنىڭ دۆلەتنىڭ جەنۇبىي شەرقىدىكى سىستان-بەلۇچىستان ئۆلكىسىدە ئامېرىكا ۋە ئىسرائىلىيەگە چېتىشلىقى بار دەپ قارالغان بىر گۇرۇپپىنى پالەچ ھالغا چۈشۈرگەنلىكىنى، بۇ جەرياندا بىر كىشىنىڭ ئۆلتۈرۈلگەنلىكىنى ۋە ئالتە كىشىنىڭ قولغا ئېلىنغانلىقىنى ئېلان قىلدى.
ئىراننىڭ جەنۇبىي شەرقىدىكى مەشغۇلاتلاردىن مەسئۇل بىر قوماندانلىق مەركىزى ئىنقىلاب مۇھاپىزەتچىلىرى قۇرۇقلۇق قىسىملىرى قودۇس باش ئىشتابى، شەنبە كۈنى ئېلان قىلغان باياناتىدا، گۇرۇپپىنىڭ ئىراننىڭ پاكىستان چېگراسىغا يېقىن سارافان رايونىغا كىرگەندىن كېيىن ئېلىپ بېرىلغان ئورتاق بىر مەشغۇلات بىلەن نىشانغا ئېلىنغانلىقىنى بىلدۈردى.
باياناتقا ئاساسلانغاندا مەشغۇلاتقا ئۆلكىلىك ئىستخبارات بۆلۈمى، ئىنقىلاب مۇھاپىزەتچىلىرى ئىستخبارات ئىدارىسى ۋە ئىران ساقچى تەشكىلاتى قاتناشقان.
ئارمىيە، گۇرۇپپىنىڭ بىر ئەزاسىنىڭ ئۆلتۈرۈلگەنلىكىنى، ئالتە ئەزاسى ۋە قوللىغۇچىسىنىڭ قولغا ئېلىنغانلىقىنى بىلدۈردى.
خەۋپسىزلىك كۈچلىرى، 20 بولاق پارتلاتقۇچ ۋە مۇناسىۋەتلىك ئەسۋاب-ئۈسكۈنىلەر بىلەن بىرگە كۆپ مىقداردىكى يېنىك ۋە يېرىم ئېغىر قوراللار، ئوق-دورا ۋە Starlink ئالاقە ئەسۋاب-ئۈسكۈنىلىرىنى قولغا چۈشۈردى.
ئىنقىلاب مۇھاپىزەتچىلىرى، گۇرۇپپىنىڭ سىستان-بەلۇچىستان ئۆلكىسىنىڭ جەنۇبىدا ئالدىن بېكىتىلگەن نىشانلارغا ھۇجۇم قىلىشنى پىلانلىغانلىقىنى ئىلگىرى سۈردى.
ئۇنىڭدىن باشقا، گۇرۇپپىنىڭ ئامېرىكا ۋە ئىسرائىلىيە بىلەن باغلىنىشلىق ئىكەنلىكىنى ۋە ئامېرىكىنىڭ ئىرانغا قارشى يۈرگۈزگەن ئۇرۇشىنىڭ بىر پارچىسى سۈپىتىدە بىر يۈرۈش ھۇجۇملارنى ئېلىپ بېرىشنى مەقسەت قىلغانلىقىنى ئىلگىرى سۈردى.
ئامېرىكا-ئىسرائىلىيەنىڭ ئىرانغا قارشى ئېلىپ بارغان ئۇرۇشى، 28-فېۋرالدا دۆلەت مىقياسىدىكى ھەربىي، يادرو ۋە ئۇل ئەسلىھە مۇئەسسىسەلىرىنى نىشان قىلىش بىلەن باشلاندى. ئىران بولسا رايوندا مەۋجۇت بولغان ۋە ئىسرائىلىيەگە ھەمدە ئامېرىكىغا تەۋە ھەربىي مەركەزلەرگە باشقۇرۇلىدىغان بومبا ۋە ئۇچقۇچىسىز ئايروپىلان بىلەن ھۇجۇم قىلىپ جاۋاب قايتۇردى.
ئىران بىلەن ئامېرىكا، ئىيۇن ئېيىدا ھۇجۇملارنىڭ ئاخىرلاشتۇرلۇشىنى مەقسەت قىلغان كېلىشىم ئىمزالىدى، لېكىن كېيىنچە كېلىشىمنىڭ ئىجرا قىلىنىشىغا مۇناسىۋەتلىك ئىختىلاپلار سەۋەبىدىن جىددىيچىلىكلەر قايتىدىن باش كۆتۈردى.
