بۇ 80 يىلدىن ئاشقان بىر ۋاقىتتىن بۇيان تۇنجى قېتىم ئوق بىلەن ئىجرا قىلىنىدىغان ئۆلۈم جازاسى بولىدۇ.
پېنتاگون دۈشەنبە كۈنى ئېلان قىلغان باياناتىدا، ئامېرىكا ھۆكۈمىتىنىڭ فورت خۇد ھۇجۇمچىسى سۈپىتىدە ئەيىبلەنگەن نىدال مالىك ھەسەننىڭ بىر ئارمىيە جازا ئەترىتى تەرىپىدىن ئېتىپ ئۆلۈم جازاسى ئىجرا قىلىنىشىنى تەستىقلىغانلىقىنى ئۇقتۇردى.
پېنتاگون باش باياناتچىسى سىئان پارنەل دۆلەت مۇداپىئە مىنىستىرى پېت ھېگسېتنىڭ ئۆلۈم جازاسىنى تەۋسىيە قىلغانلىقىنى ۋە ئامېرىكا پىرېزىدېنتى دونالد ترامپنىڭ بۇنى تەستىقلىغانلىقىنى بىلدۈردى. ئۆلۈم جازاسىنىڭ ۋاقتى ۋە ئورنىنى قۇرۇقلۇق ئارمىيەسى مىنىستىرى بېكىتىدۇ.
سابىق بىر ئارمىيە پىسخىياتۇرى ۋە مايورى بولغان ھەسەن، 2009-يىلى 5-نويابىردا تېكساستىكى فورت خۇد بازىسىدا ئوق چىقىرىپ، 13 كىشىنىڭ ھاياتىدىن ئايرىلىشىغا ۋە 32 كىشىنىڭ يارىلىنىشىغا سەۋەب بولغان ئىدى.
ھەربىي ھەيئەت، ھەسەندىن 13 قېتىم پىلانلاپ ئادەم ئۆلتۈرۈش ۋە 32 قېتىم پىلانلاپ ئادەم ئۆلتۈرۈشكە ئۇرۇنۇش جىنايەتلىرى بىلەن ئەيىبلەپ، ئۆلۈم جازاسىغا ھۆكۈم قىلغان ئىدى.
ئارمىيە تەپتىشى پولكوۋنىك ستىۋ ھېنرىكس سوت جەريانىدا، ھەسەننىڭ بازا ئىچىدە ئۆزىگە خاس بىر «شەخسىي ئۆلتۈرۈش رايونى» بەرپا قىلغانلىقىنى ئىپادىلىگەن ئىدى.
ئىككىنچى دۇنيا ئۇرۇشىدىن بۇيانقى تۇنجى ئوق بىلەن ئېتىپ ئلاتۈرۈش ئۆلۈم جازاسى
پىلانلانغان بۇ ئۆلۈم جازاسى، ئامېرىكا ھەربىي ئەدلىيە تارىخىدا ناھايىتى ئاز ئۇچرايدىغان بىر شەكىلگە ئىشارەت قىلىدۇ. ئېتىپ ئۆلۈم جازاسىغا ھۆكۈم قىلىنغان ئەڭ ئاخىرقى ئامېرىكا ئەسكىرى، ئىككىنچى دۇنيا ئۇرۇشى مەزگىلىدە قاچقانلىقى باھانىسى بىلەن 1945-يىلى ئۆلۈم جازاسىغا ھۆكۈم قىلىنغان ئەسكەر ئېددى سلوۋىك ئىدى.
ئامېرىكا ئارمىيەسى تەرىپىدىن ئىجرا قىلىنغان ئەڭ ئاخىرقى ئۆلۈم جازاسى، 1961-يىلى ئېسىپ ئۆلتۈرۈش ئارقىلىق ئىجرا قىلىنغان ئەسكەر جون بېننېت بولغان ئىدى.
